एकाच कुटुंबातील दोन मुलीचे एम पी एस सी परीक्षेत घवघवीत यश..

एक बनली विक्रीकर आयुक्त, दुसरी बनली गावातील पहिली डॉक्टर!

लातूर, दि.13(मिलिंद कांबळे)

लातूर जिल्ह्यातील दावणगाव या छोटेखानी पण प्रगल्भ गावाने आज शिक्षणाच्या इतिहासात आपले सुवर्ण अक्षरांनी नाव कोरले आहे. गावातील दोन तेजस्वी कन्यांनी आपल्या कर्तृत्वाने संपूर्ण समाजाला प्रेरणा दिली आहे.
कु. प्रणिती मदन भंडे हिने MPSC परीक्षेत राज्यात पाचवा क्रमांक मिळवून थेट विक्रीकर आयुक्त (क्लास–1 अधिकारी) पदावर निवड मिळवली आहे. तर दुसरी कन्या डॉ. अक्षदा प्रकाश साखरे हिने M.D. मेडिसिन ही प्रतिष्ठित पदवी मिळवत दावणगावची पहिली डॉक्टर होण्याचा मान मिळवला आहे.
या दोन्ही कन्यांच्या यशाचा उत्सव साजरा करण्यासाठी ग्रामस्थांनी अभूतपूर्व स्वागत सोहळा आयोजित केला. फुलांच्या वर्षावात, ढोल ताशांच्या गजरात आणि जयघोषात संपूर्ण गाव आनंदाने थरारून गेले.
या कार्यक्रमाच्या अध्यक्षस्थानी डॉ. सतीश भंडे होते. यावेळी उपजिल्हाधिकारी श्री. सुशांत शिंदे (उदगीर) यांच्या हस्ते दोन्ही कन्यांचा मान्यवरांच्या उपस्थितीत सत्कार करण्यात आला.
या प्रसंगी प्रा. डॉ. शिवाजी मुळे (माजी सभापती, प. स. उदगीर), ज्ञानेश्वर पाटील (सरपंच), महेश फुले (शिवसेना), दत्ताजी भंडे, हरिदास भंडे, किरण पाटील (मु. जी. प.), ज्ञानोबा भंडे (कवी), नागोराव भंडे आदी मान्यवर उपस्थित होते.
गावातील महिला मंडळ, युवक मंडळ तसेच ज्येष्ठ नागरिकांनी कार्यक्रमात उत्स्फूर्त सहभाग घेतला. वातावरणात अभिमान, आनंद आणि प्रेरणेची भावना दाटून आली होती.
दावणगावच्या या दोन कन्यांनी सिद्ध केले की “शिक्षणच खरे सामर्थ्य, आणि ज्ञानच गावाच्या विकासाचा दीप आहे!”