सर्वोच्च न्यायालयात सरन्यायाधीशांवर धक्कादायक हल्ल्याचा प्रयत्न
आज सर्वोच्च न्यायालयातील सुनावणी दरम्यान धक्कादायक घटना घडली. सरन्यायाधीश भूषण गवई यांच्यावर हल्ल्याचा प्रयत्न झाला. सुनावणी दरम्यान एका वकिलाने कोर्टरूममध्ये बूट फेकण्याचा प्रयत्न केला, पण सुरक्षा कर्मचाऱ्यांनी त्याला वेळीच रोखले.
प्राथमिक माहितीनुसार, वकिलाने मंचाजवळ जाऊन बूट काढून फेकण्याचा प्रयत्न केला, परंतु सुरक्षा कर्मचाऱ्यांच्या तत्परतेमुळे तो अयशस्वी झाला. नंतर वकिलाला कोर्टाबाहेर काढण्यात आले, त्यावेळी तो आरडाओरडा करत होता, “सनातनचा अपमान सहन करणार नाही!”
सर्वोच्च न्यायालयातील ही घटना सुरू असताना मुख्य न्यायाधीश गवई शांत राहिले आणि म्हणाले,
“अशा प्रकारांनी आम्ही विचलित होत नाही. तुम्ही तुमचा युक्तीवाद सुरु ठेवा.”
या प्रकरणामागील पार्श्वभूमी अशी आहे की, खजुराहो येथील भगवान विष्णूंच्या नुकसानग्रस्त मुर्तीशी संबंधित जुन्या प्रकरणात सरन्यायाधीशांनी एक टिप्पणी केली होती. त्यांच्या विधानाचा काही हिंदुत्ववादी संघटनांनी विरोध केला. सुरक्षारक्षकांनी मात्र घटनेचा निराळा प्रकार सांगितला आणि म्हटले,
“कोर्टात एका माणसाने आरडाओरडा केला. त्याला आम्ही बाहेर काढलं.”
मुख्य न्यायाधीशांची टिप्पणी:
खजुराहो येथील या प्रकरणावर सरन्यायाधीश गवई म्हणाले,
“जा, देवांनाच काहीतरी करायला सांग. तू म्हणतोस तू भगवान विष्णूंचा कट्टर भक्त आहेस, तर जा आणि प्रार्थना कर. हे एक पुरातत्व स्थळ आहे, ASI इत्यादींची अनुमती आवश्यक आहे. क्षमा करा.”
या वक्तव्यानंतर विरोधाची मोठी लाट उठली आणि काही लोकांनी त्यांच्या राजीनाम्याची मागणी केली.
वाद वाढल्यानंतर मुख्य न्यायाधीश गवई म्हणाले,
“माझ्या टिप्पणीला सोशल मीडियावर चुकीच्या पद्धतीने सादर करण्यात आलं. मी सर्व धर्मांचा सन्मान करतो.”
About the Author
