निलंगा तालुक्यातील वडगाव शाळेचा स्नेह संमेलन सोहळा संपन्न !

निलंगा,दि.२६

ज्ञान, संस्कार आणि कलागुणांची सांगड घालत जिल्हा परिषद प्राथमिक शाळा, वडगाव येथे आयोजित करण्यात आलेले वार्षिक स्नेहसंमेलन यंदा अभूतपूर्व उत्साहात आणि जल्लोषात पार पडले. ‘उत्सव कलागुणांचा’ या संकल्पनेवर आधारित या सोहळ्याने उपस्थितांच्या मनावर अक्षरशः मोहिनी घातली.

कार्यक्रमाचे उद्घाटन पंचायत समितीच्या नूतन सभापती सौ. सुनीताताई संतोष वाघमारे आणि उपसभापती सौ. अश्विनीताई बालाजी वाघमारे यांच्या हस्ते दीपप्रज्वलन करून करण्यात आले. यावेळी प्रमुख पाहुणे म्हणून नूतन जिल्हा पंचायत समिती सदस्या सौ. शिल्पाताई परमेश्वर शिंदे, वडगावचे सरपंच श्री. धोंडीराम नाना बिरादार, उपसरपंच श्री. सत्यवानजी झरे, माजी जिल्हा परिषद सदस्य श्री. संतोषजी वाघमारे, माजी तंटामुक्ती अध्यक्ष श्री. बाबासाहेब सूर्यवंशी, श्री. माधव सूर्यवंशी तसेच जिल्हा परिषद केंद्रीय प्राथमिक शाळेचे मुख्याध्यापक श्री. दिनकरजी दिवे सर यांची मान्यवर उपस्थिती लाभली. ग्रामपंचायत सदस्य आणि पालकवर्गानेही मोठ्या संख्येने उपस्थित राहून कार्यक्रमाची शोभा वाढवली.
सांस्कृतिक कार्यक्रमात विद्यार्थ्यांनी सादर केलेल्या नृत्य, नाटिका, देशभक्तीपर गीत, लोककला सादरीकरणे आणि सामाजिक संदेश देणाऱ्या प्रयोगांनी प्रेक्षकांची मने जिंकली. प्रत्येक सादरीकरणात विद्यार्थ्यांचा आत्मविश्वास, सर्जनशीलता आणि मेहनत ठळकपणे दिसून आली. लहानग्यांच्या अभिनयाने आणि नृत्याविष्काराने उपस्थितांकडून टाळ्यांचा कडकडाट होत राहिला.

या कार्यक्रमाच्या यशस्वी आयोजनामागे शाळेतील शिक्षकवृंदाचा मोलाचा वाटा राहिला. सौ. सोळुंके मॅडम, अन्नपवाड मॅडम, झिन्नेवाड सर, बालूरे सर, लखने सर आणि जाधव सर यांनी विद्यार्थ्यांकडून उत्कृष्ट सादरीकरण घडवून आणण्यासाठी विशेष परिश्रम घेतले. त्यांच्या मार्गदर्शनामुळेच कार्यक्रमाला दर्जेदार स्वरूप प्राप्त झाले.

पालकांनी मोठ्या संख्येने उपस्थित राहून आपल्या मुलांच्या कलागुणांना उत्स्फूर्त प्रतिसाद दिला. विद्यार्थ्यांच्या प्रगतीचा अभिमान त्यांच्या चेहऱ्यावर स्पष्ट दिसत होता. शाळा आणि पालक यांच्यातील सुसंवादाचे हे एक उत्कृष्ट उदाहरण ठरले.
एकंदर, वडगाव जिल्हा परिषद प्राथमिक शाळेचा हा वार्षिक स्नेहसंमेलन सोहळा केवळ सांस्कृतिक कार्यक्रम न राहता विद्यार्थ्यांच्या सर्वांगीण विकासाचे द्योतक ठरला. गावाच्या शैक्षणिक आणि सांस्कृतिक जीवनात नवा उत्साह निर्माण करणारा हा सोहळा दीर्घकाळ स्मरणात राहील, यात शंका नाही.