निलंगा, दि. २३
पावसाअभावी खरीप हंगाम अडचणीत आलेल्या शेतकऱ्यांच्या परिस्थितीची शासनाने गंभीर दखल घेतली असून, दुष्काळासंदर्भातील पहिली अधिसूचना लवकरच प्रसिद्ध करण्यात येणार असल्याची माहिती मुख्यमंत्री देवेंद्र फडणवीस यांनी दिली. शासन शेतकऱ्यांच्या पाठीशी खंबीरपणे उभे असून, आवश्यक ती मदत उपलब्ध करून देण्यात येईल, असेही त्यांनी स्पष्ट केले.
मुख्यमंत्री देवेंद्र फडणवीस यांनी बुधवारी निलंगा तालुक्यातील जाऊ परिसरातील दुष्काळी परिस्थिती आणि पीक-पाणी स्थितीची पाहणी केली. यावेळी त्यांनी शेतकऱ्यांशी संवाद साधून पिकांची सद्यस्थिती तसेच पाणीटंचाईबाबत माहिती घेतली.
दुष्काळी परिस्थितीच्या पार्श्वभूमीवर आवश्यक उपाययोजनांबाबत शासनस्तरावर कार्यवाही सुरू असल्याचे मुख्यमंत्री फडणवीस यांनी सांगितले. दुष्काळासंदर्भातील अहवाल शासनाला प्राप्त झाले असून, सध्याची परिस्थिती गंभीर असल्याचे त्यांनी नमूद केले. शेतकऱ्यांना आवश्यक ती मदत देण्यासाठी शासनाकडून कार्यवाही करण्यात येत असल्याचेही त्यांनी सांगितले.
शेती पिकांचे पंचनामे करण्याचे आदेश देण्यात आले असून, त्यानंतर परिस्थितीचा आढावा घेऊन शेतकऱ्यांना मदत देण्याबाबत शासन निर्णय घेणार असल्याचे मुख्यमंत्री म्हणाले. तसेच पुण्यश्लोक अहिल्यादेवी होळकर शेतकरी कर्जमुक्ती योजनेचा लाभ पात्र शेतकऱ्यांना देण्यात येत असून, यासाठी आवश्यक निधी उपलब्ध करून देण्यात येणार असल्याचे त्यांनी स्पष्ट केले.
दुष्काळी परिस्थितीत पाणी, जनावरांसाठी चारा आणि अन्य आवश्यक बाबींचे नियोजन करण्यात आले आहे. परिस्थितीनुसार आवश्यक उपाययोजना करण्याचे काम शासनस्तरावर सुरू असल्याचेही मुख्यमंत्री फडणवीस यांनी सांगितले.
यावेळी सहकार मंत्री बाबासाहेब पाटील, पालकमंत्री शिवेंद्रराजे भोसले, माजी मंत्री संभाजी पाटील निलंगेकर, संजय बनसोडे, खासदार ओमराजे निंबाळकर, आमदार बसवराज पाटील मुरूमकर, आमदार अभिमन्यू पवार आदी उपस्थित होते.
About the Author
